Dementzia goraka doan osasun arazo bat da munduan; kalkulu batzuek diotenez, 75 milioi pertsonak baino gehiagok izango dute dementzia 2030erako. Narriadura kognitibo arina (NKA) duten pertsonek dementzia-arrisku handiagoa dute. Journal of Post-Acute and Long-Term Care Medicine aldizkarian argitaratutako azterlan batean, ikertzaileek ausazko saiakuntza kontrolatuen berrikuspen sistematikoa egin zuten, honako hauek ebaluatzeko:
- NKA duten pertsonen jarduera fisikoaren eta dementziaren arteko erlazioa; eta
- jarduera fisikoak osasun funtzionalean, osasunari lotutako bizi-kalitatean eta kontrako gertaeretan duen eragina.
Guztira, 27 berrikuspen sistematiko ebaluatu zituzten egileek, 28.000 parte hartzaile baino gehiago barne hartuta.
Ikusi zen jarduera fisikoak eragin estatistikoki esanguratsua izan zuela narriadura kognitibo arina zuten pertsonen kognizioan, eta eragin onuragarriak izan zituela arretan, funtzionamendu exekutiboan eta memorian. Jarduera fisiko konbinatuak (adibidez, bai ariketa aerobikoa, bai erresistentziakoa barne hartzen duen esku-hartzea) eta ariketa aerobiko hutsak emaitza kognitibo batzuk hobetu zituzten, baina ez zuten eraginik izan desgaitasunean.
Alzheimer gaixotasuna eta beste dementzia mota batzuk zituzten pertsonengan, jarduera fisiko konbinatuak kognizio orokorra hobetu zuen, baina ez zien beste neurri kognitiboei eragin, hala nola hizkuntzari, abiadura motorrari edo memoriari. Jarduera fisikoak erortzeko arriskua eta erorikoen kopurua murriztu zituen, antza. Etxean egindako ariketak hobetu egin zituen dementziarekin batera etor daitezkeen desgaitasuna, sintoma depresiboak eta beste sintoma emozional, psikologiko eta jokabidezko batzuk.
Berrikuspen horrek agerian uzten du jarduera fisikoak nabarmen hobetzen dituela dementzia eta NKA duten pertsonen emaitza kognitiboak eta ez-kognitiboak (erortzeko arriskua eta sintoma depresiboak, adibidez). Hala ere, ebidentzia kalitate txikikoa edo ertainekoa izan zen, eta aztertutako azterlanek alboratzeko arrisku handia zuten; horrek esan nahi du ikerketa gehiago egin behar direla aurkikuntza horiek berresteko.